أحمد فهمي عن دوره في "سفاح الجيزة": "كنت عايز أخرج من الكوميديا وطبخت كويس وتخنت"

تحدث الفنان أحمد فهمي عن دوره في مسلسل "سفاح الجيزة"، وخروجه عن سياق الكوميديا الذي اعتاد الجمهور أن يراه به.

وقال أحمد فهمي عن تفاصيل مسلسله "سفاح الجيزة" من خلال تصريحات تليفزيونية: "لقيت طارق المنتج في المكتب بيقولي لو حابب تكسر الكوميديا بتحب دور إيه".

وتابع أحمد فهمي: "قلت له بحب الممثل اللي مش مثالي اللي مش بيقوم يبوس إيد مامته وكده، فطلع حلقة قرأتها في نص ساعة وخرجت قولتله تمام يلا.. واتفقنا وأنا أصلا كنت متابع القضية.. وحضرنا لمسلسل سفاح الجيزة على مدار عامين والمخرج هادي الباجوري في بروفات الترابيزة قالي عاوزك تشتغل براحتك".

وأضاف: "بدأنا نتكلم على كل التفاصيل منها الصوت والابتسامة، وهادي الباجوري قالي أنت بتحب أي نوع في الأبطال قولتله بحب البطل اللي مش مثالي ومن هنا جاء مسلسل سفاح الجيزة وكان نفسي أنجح في السفاح بعد نجاح فيلمي مستر إكس، ودا حصل بفضل مجهود ناس كتير وكل واحد اجتهد واشتغل على المشروع صح.. والمخرج هادي الباجوري السبب في اختيار نبرة صوتي وساعدني في اختيار الشخصية".

وكشف أحمد فهمي عن طبخ سفاح الجيزة ضمن أحداث العمل: "طبخت كويس في المسلسل وتخنت من كتر الأكل والمخرج قالي أنا عايز وشك يخس بس كرشك يكبر شوية.. والصعب إنك تحافظ على الشخصية طول الوقت بنفس نبرة الصوت لأنه مش صوتي الأصلي".